Oravant tut il grond diever d'antibiotics en la medischina ed agricultura chaschuna la derasaziun da bacterias multiresistentas. Savens vegnan antibiotics perscrits en cas, nua ch'antibiotics na fissan betg necessaris. Perquai ha il Fond naziunal svizzer proponì in sistem da controlla anonim.
Surveglianza da prescripziun d'antibiotics
Sur il rendaquint da la cassa da malsauns pon ins controllar tgenins medis e medias che prescrivan fitg blers antibiotics. Medis e medias na sajan savens betg pertscherts ch'els prescrivan antibiotics per nagut. Il sistem ch'è vegnì sviluppà a Basilea po contactar ils medis en moda anonima e far attent sin il surdiever d'antibiotics.
Ulteriur test per malsognas da la via respiratorica
Oravant tut tar problems cun il lom vegnan savens prescrits antibiotics, era sch'i na dat nagina infecziun cun bacterias. En quel cas na gida in antibiotic dentant nagut.
Per controllar sch'i saja propi in'infecziun cun bacterias, ha l'ospital da l'Universitad da Losanna sviluppà in test bunmartgà. Sche quel inditgescha ch'igl ha bacterias, lura pon ins anc far in test cun ina sonografia. Pir lura saja la prescripziun d'in antibiotic giustifitgada. En in'emprima emprova han medias gia reducì lur diever per 30%, e quai senza che las persunas malsaunas han stuì desister d'in tractament adequat.
Or da l'archiv:
