A la staziun da cunfin a Buchs en il chantun Sogn Gagl, entran adina dapli persunas illegalmain il pajais. Mesemna avantmezdi han las autoritads nudà stgars 40 persunas ch'èn arrivadas illegalmain. Cunzunt fugitivs ord l'Afganistan vegnian savens cun tren da Vienna a Buchs. Blers dad els sajan en in proceder d'asil en l'Austria, ma hajan la finamira d'ir en Frantscha ubain la Gronda Britannia. Manar enavos las persunas è tenor la Polizia chantunala da Sogn Gagl ina gronda sfida. Savens svaneschian ils fugitivs avant che lur cas pon vegnir concludids birocraticamain. Per meglierar questa procedura, duai dar il december a Buchs in nov center.
Dumber ha prendì tiers andetgamain
Entradas illegalas a la staziun da Buchs hajan prendì tiers. Dapi il fanadur han las autoritads dumbrà 2'500 persunas, savens umens giuvens e giuvenils minorens. Per las autoritads saja quai ina gronda sfida, ha ditg il minister da giustia dal chantun Sogn Gagl Fredy Fässler. Auter che durant l'unda da fugitivs il 2015 haja strusch famiglias che veglian entrar.
Ord l'archiv
Suenter che las autoritads da Laax eran sa riscudidas cunter in center d'asil, èn ils emprims fugitivs arrivads a Laax il 2015. Ils Cuntrasts mussan la situaziun: