Var 124’000 suttascripziuns han ils iniziants rimnà – sco els han communitgà. L’iniziativa è vegnida lantschada avant dus onns, radund 80 organisaziuns ed interpresas la sustegnan. Tiers tutgan commembers da la PS e dals Verds, sco era diversas gruppas che s’engaschan per la protecziun d’animals.
Dasper il scumond da far experiments cun animals ed umans, vul l’iniziativa era scumandar l’import da products per ils quals ins ha fatg experiments cun animals ed umans.
Refusà in scumond il 1992
I na sa tracta betg da l’emprima iniziativa en Svizra, che prenda en mira ils experiments cun animals. L’onn 1992 ha il suveran svizzer sbittà in’iniziativa, che vuleva cuntanscher cun plirs pass in scumond d’experiments cun animals.
Experimentà vegn cunzunt cun mieurs
Tenor L’Uffizi federal da segirezza alimentara e fatgs veterinars èn experiments lubids en Svizra, mo sch’i na dat naginas alternativas. Il 2017 han ins duvrà passa 600’000 animals per experiments, dus terzs dals animals da test eran mieurs.
RR novitads 15:00