Il servetsch da spiunadi svizzer ha dà vinavant datas a firmas da segirtad privatas. Quai ha Maya Graf, la presidenta da la delegaziun da la cumissiun da gestiun, confermà a SRF. Las datas aveva il servetsch da spiunadi rimnà tar providers privats: Quai a moda illegala, sco ina retschertga da l'anteriur derschader federal Niklaus Oberholzer ha mussà.
Tge datas?
Il ressort cyber dal servetsch da spiunadi ha rimnà l'entir cuntegn dal server ch'el ha gì en mira. Ed el haja er per part surveglià il traffic da datas sin quel. Tenor Graf ha il ressort fatg quai tar pli che 50 servers, e surveglià dapli che 100 giadas.
In professur per dretg statal di che quai saja cleramain illegal: Quai sajan datas heiclas. En la lescha n'èsi betg prevesì ch'ins dettia vinavant talas datas a firmas privatas, uschia professur Rainer J. Schweizer. Il servetsch da spiunadi n'ha commentà quai envers SRF. Tenor il Departament federal da defensiun dastga il servetsch da spiunadi dar vinavant datas a firmas privatas en il rom da sia collavuraziun cun quellas.
L'autoritad da surveglianza independenta sur da las activitads dal servetsch secret vul ussa in scleriment. Envers SRF ha ella confermà d'avair instradà ina nova controlla.
