Siglir tar il cuntegn

Header

cuntegn

Svizra Cuntraproposta a l’iniziativa «per la segirtad alimentara»

Il Cussegl naziunal sustegn la cuntraproposta a l’iniziativa «per la segirtad alimentara». Quai ha el decidì cleramain cun 173 cunter 7 vuschs ed 11 abstenziuns. Uschia suonda el la proposta dal Cussegl dals chantuns.

L’iniziativa aveva l’Uniun purila da la Svizra lantschà. L’idea è da fixar en la constituziun federala las cundiziuns per producir victualias e per garantir il provediment da la populaziun svizra.

«Segirar terren agricul è impurtant»

audio
Saira: Tge vul la cuntraproposta?
ord Actualitad dals 07.03.2017.
laschar ir. Durada: 2 minutas 26 Secundas.

Tranter auter duai vegnir fixà en la constituziun ch'il terren agricul duai vegnir segirà. Per il pur e cusseglier naziunal Duri Campell (PBD) è quai in punct central: Il terren agricul saja la pli impurtanta premissa per pudair producir buns products. Deblorablamain saja il squitsch sin il terren agricol grond.

Ulteriuras cundiziuns ch'il parlament è pront da fixar en la constituziun federala: Las victualias duain vegnir producidas tenor las atgnadads localas, cun nizzegiar effizient las ressursas (sco p.ex. il terren, l’aua u ils animals), ils products duain esser orientads al martgà ed ins na duai betg sfarlatar victualias.

Ed uschia vesa l'artitgel ora che duai vegnir integrà en la constituziun federala:

Art. 104a

Segirtad alimentara

Per garantir il provediment da la populaziun cun victualisas creescha la Confederaziun las premissas per:

a) Segirar la basa per la producziun agricula, surtut il terren agricul

b) Ina producziun che risguarda las atgnadads localas e nizzegia effizient las ressursas

c) In’agricultura e producziun alimentara che sa drizza al martgà

d) Relaziuns da commerzi sur cunfins, che contribueschan ad in’agricultura e producziun alimentara persistenta

e) Tractar victualias cun quità a las ressursas

Purs èn pronts da retrair lur iniziativa

L’Uniun purila svizra po acceptar la cuntraproposta che las duas chombras parlamentaras proponan. Ella ha signalisà da retrair sia iniziativa "per ina segirtad alimentara" sch'il parlament accepta la cuntraproposta en la votaziun finala ils 14 da mars.

L'ultim pled en chapitel ha il suveran svizzer. Cura che la votaziun ha lieu n'è anc betg enconuschent.

RR actualitad 17:00

Artitgels legids il pli savens