La Svizra e l’Italia han suttascrit a Roma ina nova cunvegna davart l’imposiziun da cunfinaris ed in protocol da midar la cunvegna d'imposiziun dubla. Per che quella entra en vigur ston ils parlaments dad omadus pajais approvar ella.
Cun la segunda tentativa
Gia l'onn 2015 han ils dus pajais vulì remplazzar la cuvegna da l'onn 1974. Lura n'èn ins betg vegni perina, la resistenza ord l'Italia era memia gronda. Quest onn han ins danovamain tschertgà il discurs. Quels hajan manà ils ultims mais adina sliaziun cuntentaivla per omaduas varts, scriva il Departament federal da finanzas.
Pli autas taglias
La nova cunvegna meglierescha marcantamain las reglas actualas e contribueschia da mantegnair las bunas relaziuns bilateralas tranter ils dus pajais, communitgescha il departament. Per ils cunfinaris che lavuran da nov en Svizra s'augmenta la taglia sin 80%. Il 2015 eran anc previs 70%.
Davent il 2034 nagins pajaments da gulivaziun pli
Fin uss èn ils cunfinaris cun domicil en l'Italia vegnids suttamess a la taglia sulet en Svizra. Da las entradas da la taglia da funtauna ha il chantun svizzer pertutgà dà vinavant radund 40% ord la gulivaziun finanziala a la vischnanca da domicil en l'Italia. Fin il 2033 na sa mida nagut vid quella pratica. Davent l'onn da taglia 2034 na paja la Svizra nagut pli a la vischnanca da domicil taliana.
Ulteriuras infurmaziuns
Da persunas che daventan cunfinaris suenter che la cunvegna è en vigur, pretenda la Svizra ina taglia da funtauna dad 80%. En l'Italia vegn l'entrada dals cunfinaris lura suttamess a la taglia ordinaria, quai dentant cun guntgir ina imposiziun dubla. Il stadi da domicil eliminescha l’eventuala imposiziun dubla da taglia. Per persunas che lavuran u han lavurà dapi ils 31 da december 2018 en il Grischun, Tessin u Vallais - vala ina reglamentaziun transitorica.
Definiziun clera e reglas
La cunvegna cuntegna era ina definiziun clera da cunfinarias e cunfinaris: Quai èn tuttas persunas ch'abiteschan en ina vischnanca pli pauc che 20km davent il cunfin e che pon «da principi» returnar mintgadi en lur vischnanca da domicil.