Siglir tar il cuntegn

Header

Navigaziun

Bandiera da la Svizra e da l'UE
Legenda: Ura da sclerir las dumondas avertas – quai sajan la protecziun da las pajas, ils sustegns statals ed ils dretgs dals burgais da l'UE. Keystone
cuntegn

Cunvegna da basa Svizra – UE Parlamentaris grischuns sceptics

Parlamentarias e parlamentaris dal Grischun èn sceptics: Per chattar ina via ord la stretga davart la cunvegna da basa stoppia il Cussegl federal ussa sclerir las dumondas avertas.

Candinas: «Mussar buna gnerva»

La pressiun saja gronda e quai tant da vart da la Svizra sco era da vart da l'Uniun europeica, di il cristiandemocrat Martin Candinas. I valia perquai da restar ruassaivel e d’avair buna gnerva. La fin finala haja era l’UE in interess da sa cunvegnir sin ina buna schliaziun en la dumonda da la cunvegna da basa.

Perquai stoppian las dumondas avertas davart la protecziun da las pajas, ils sustegns statals ed ils dretgs ch'ils burgais da l'UE duain il futur avair en Svizra vegnir scleridas:

Jau crai ch’ina maioritad da la populaziun è fitg averta per bunas relaziuns cun l’Uniun europeica, dentant betg per tut pretsch. Cunzunt vulan els vesair che la politica fa tut il pussaivel per cuntanscher uschè bler sco pussaivel per noss pajais.
Autur: Martin Candinascusseglier naziunal PCD/GR

Il Cussegl federal stoppia perquai restar consequent.

Campell: Faussa strategia dal Cussegl federal

Gist quai haja lez dentant laschà mancar ils ultims onns, di il burgais democrat Duri Campell:

Els han adina mo reagì enstagl d’agir. E sch’ins agescha han ins las mastrinas en maun. Uschiglio han auters las mastrinas en maun.
Autur: Duri Campellcusseglier naziunal PBD/GR

Il Cussegl federal haja gì la strategia da trair las negoziaziuns a la lunga. Quai haja ussa consequenzas negativas. I dovria ussa ina debatta intensiva, cunzunt era cun la populaziun, per chattar ina via ord la stretga.

Martullo: Sclerir dumondas avertas

Medemamain betg cuntenta cun il Cussegl federal è Magdalena Martullo da la PPS. Ella haja il sentiment che lez emprovia da seser ora l'entira chaussa, da spetgar enfin suenter las elecziuns per lura forsa avair novas maioritads en il Parlament federal.

Era ella saja da l'idea ch'ins stoppia ussa sclerir quellas dumondas avertas. Quai na midia dentant pauc vid il problem central da la cunvegna da basa:

Uschè ditg che nus stuain surprender a moda automatica dretg da l’UE, nus pudain bain anc votar surlonder, vegnin dentant chastiads, sche nus na surprendain betg, uschè ditg che quai è part da la cunvegna datti simplamain problems e nus essan segiramain cunter.
Autur: Magdalena Martullocussegliera naziunala PPS/GR

Semadeni: Cunvegna nova illusoric

Pli positiv vesa la socialdemocrata Silva Semadeni la cunvegna da basa ch'è ussa sin maisa. Natiralmain dovri anc precisiuns tar las dumondas ch'il Cussegl federal ed il parlament han formulà. Da vulair negoziar da nov la cunvegna saja dentant illusoric:

Perquai stuain nus ir sin questa via, empruvar da metter sin maisa tge che quellas decisiuns muntan concret e tge che nus pudain far en Svizra per render quai acceptabel per la populaziun.
Autur: Silva Semadenicussegliera naziunala PS/GR

Schmid: Balla uss tar il Cussegl federal

Ch'i saja era en l’interess da la Svizra e da la via bilaterala da chattar ina cunvegna cun l'UE crai il liberaldemocrat Martin Schmid. Natiralmain che l'economia fetschia squitsch en quella direcziun.

La fin finala stoppian ins dentant persvader las Svizras ed ils Svizzers ch'ina cunvegna saja la dretga via. E perquai saja la balla ussa tar il Cussegl federal. Lez stoppia sclerir las dumondas avertas:

Datti anc bancas chantunalas, datti anc assicuranzas d’edifizis, tge schabegia cun vischnancas che sustegnan lur pendicularas? Questas dumondas ston tuttas vegnir respundidas. E lura po la populaziun, sco nus en il Parlament federal, considerar il pro e contra.
Autur: Martin Schmidcusseglier dals chantuns PLD/GR

Cler saja per el ch’il tema Europa na vegnia uschè spert betg a svanir da l'agenda politica.

RR actualitad 07:00