Siglir tar il cuntegn

Header

cuntegn

Cunvegnas da pretschs Stöckli sto pajar chasti da 140'000 francs

Il producent da skis «Stöckli» sto pajar ina multa da 140'000 francs. Quai pervi da cunvegnas illegalas davart ils pretschs. A questa summa sajan sa cunvegnids la WEKO e Stöckli. Quai ha communitgà la cumissiun da concurrenza.

Tranter Stöckli e ses vendiders haja dà tranter ils onns 2003 e 2018 cunvegnas illegalas davart ils pretschs. Tenor quellas eri scumandà als vendiders dad offrir ils skis ad in pretsch pli bass che quai che Stöckli aveva proponì. Talas cunvegnas cuntrafan a la lescha da cartel. Perquai ha la WEKO cumenzà d’investigar la stad passada cunter il producent da skis. Perquai che «Stöckli» haja cooperà, saja la multa stada pli bassa.

Vendiders èn uss libers da decider pretschs

Il producent da skis saja sa cunvegnì cun la WEKO ch'el na po betg pli fixar pretschs minimals u fixs per vender lur skis. Cun quai èn ils vendiders uss libers da decider ils pretschs. Plinavant saja uss er reglà la vendita da skis da Stöckli online sco era l'import direct e parallel da products da Stöckli.

audio
Per tadlar curt e cumpact – Stöckli sto pajar chasti
ord Novitads dals 05.09.2019.
laschar ir. Durada: 49 Secundas.

RR novitads 10:00

Artitgels legids il pli savens