Il curs da l'euro è l’emprim crudà in toc sut 1 franc e suenter lura sa stabilisà tar rodund 1,04 CHF per euro. Tenor l’expert da finanzas, Damian Gliott, vegnia quai era a restar uschia a media vista. A lunga vista pudess il curs schizunt anc sa sbassar, uschia Damian Gliott.
Schliar problems entaifer l'Europa
Sch’ins miria dentant con ferma che l’economia en ils pajais da l’euro è, stuess il curs esser tar rodund 1,25 francs. Perquai stuess la UE dentant dumagnar da schliar ses problems entaifer l’Europa. «En quai craja dentant nagin», di Gliott. Las refurmas na vegnian betg messas enturn consequentamain. Il motiv saja ch'ils pajais sappian, che quai na vegnia ad avair naginas consequenzas.
Sche jau sai che nagin dat a mai giu per la detta, cura ch’jau na sa tegn betg vi da quai ch’è prescrit, èsi cler che l’entir sistem na funcziuna betg. E quai schabegia il mument en Grezia.