Tgi che vul anc far quest enviern in curs per la segirtad da lavurar en il guaud è gia memia tard. Ils bun 200 instructurs da «Guaud Svizra» sajan per quest enviern gia occupads. Per far la lavur pli segira, ston tuts che lavuran en il guaud, e fadian daners cun quella, far in curs da 10 dis. Quai vala era per purs ed auter lavurers parzials, sco Florian Landolt da Guaud Svizra, la Federaziun da possessurs da guaud, di. Quest obligatori datti dapi il 2017, cun in temp transitoric da 5 onns. Quel è ussa scadì.
Blers hajan tenor Landolt manchentà d'absolver in curs ils onns passads, ed er sch'els fan amogna dapli curs ch'en auters onns, na tanscha la purschida betg pli. I dovria tenor Guaud Svizra plirs onns enfin che tuts han fatg il curs, che stuessan. Tgi che n'ha betg absolvì il curs na dastga betg pinar laina l'enviern. Tgi che va tuttina en il guaud ristga problems cun la segirada.
Tenor la Suva datti mintg'onn radund 1700 accidents tar questa lavur. La professiun da lavurers da guaud vala sco ina cun ils pli blers accidents en Svizra.
