Per interpresas tar quellas che la Confederaziun è l'acziunari u il proprietari principal duain ins fixar ina paja maximala: La pli auta paja duai muntar a maximalmain 500'000 francs ad onn. Quai aveva il cusseglier naziunal Corrado Pardini (PS) pretendì cun sia moziun.
En sia chombra ha el chattà sustegn cun 11 tar 74 vuschs. La chombra pitschna è dentant sa decidida da refusar la limitaziun da paja per manaschis liads cun la Confederaziun.
Paja betg giustifitgada
I na dettia nagina argumentaziun plausibla per il fatg che topmanagers d'interpresas liadas cun la Confederaziun hajan in salari pli aut ch'ils commembers dal Cussegl federal, aveva Pardini argumentà sia moziun.
Dapi onns vegnia discussiunà davart excess da paja. Las pajas creschian dentant adina pli fitg, senza che las prestaziuns dals managers vegnia meglra. Cun quest argument ha Christian Levrat (PS) pledà per la moziun.
Chombra pitschna dat enavos la balla
Era la la cumissiun statala e politica da la chombra ch'ha refusà la moziun è da l'avis ch'in stoppia agir. Ditg «na» a la moziun haja ella dentant perquai che quella saja memia pauc flexibla. Cun in'iniziativa parlamentara ha la chombra pitschna perquai dà enavos la balla a la chombra gronda. Quella pretenda che la Confederaziun fixeschia ina summa da referenza ed adatteschia quella tut tenor pensum da la persuna. Basa per fixar la summa duain esser las pajas annualas bruttas dals cussegliers federals ch'èn tranter 800'0000 ed 1 milliun francs.
Il Cussegl federal aveva refusà la moziun. Minister da finanzas Ueli Maurer aveva regurdà al fatg che la Confederaziun haja sco proprietari influenza sin las pajas. El ha discurrì d'in cunfin maximal da radund 1 milliun francs.
RR novitads 06:00