L’iniziativa RASA ha survegnì da Berna 3 giadas in na: Dal cussegl federal, dal Cussegl naziunal ed oz anc dal Cussegl dals chantuns. Senza cuntraproposta duai l’iniziativa ir davant il pievel, sch'ils iniziants na tiran betg enavos l’iniziativa.
Rasa è ina reacziun sin l’iniziativa d’immigraziun acceptada il 2014 e munta «Raus aus der Sackgasse». Finamira da l’iniziativa è da mantegnair ils contracts bilaterals cun l’UE. Ella vul stritgar l’artitgel en la constituziun senza remplazzament. Ella è vegnida inoltrada l’october 2015 cun 110’000 suttascripziuns.
Il Cussegl dals chantuns vul finir la discussiun enturn l'artitgel d'immigraziun uschè svelt sco pussibel. Sco il Cussegl naziunal, refusa era el l'iniziativa da Rasa, senza cuntraproposta. Ils iniziants ston ussa decider sch'els vulan retrair l'iniziativa u betg.
Dischillus da Berna
I saja simplamain deplorabel di Thomas Geiser dal comité da la RASA ch'i na saja vegnì da Berna nagina cuntraproposta a l’iniziativa. Tenor el saja quai ina schanza manchentada.
En ils proxims dis vegnian ins a discussiunar en il comité da la RASA sch’ins veglia trair enavos l’iniziativa u betg. Anc uss na saja decis nagut, ha ditg Geiser.
