Il Cussegls dals Chantuns vul che lufs vegnan regulads sco capricorns. Quai vul dir ch’ins definescha onn per onn quants lufs ch'ins po dar liber per la chatscha. Quai vul er dir ch'i fiss nov er pussaivel da sajettar entirs trieps. Il Cussegl dals chantuns ha votà sco emprima chombra cun 31 cunter 6 vuschs per la proposta che sia cumissiun per ambient ha preparà. Il Cussegl naziunal sto pir anc decider en chaussa.
Il Cussegl federal sustegna la proposta per la lescha da chatscha. Sco ch'el scriva, na duain lufs betg vegnir sajettads pir suenter ch'els han chaschunà donns. La regulaziun dals lufs gidia ad impedir donns en l'avegnir.
Cussegliers da las partidas burgaisas han sustegnì questa proposta. Sche la populaziun dals lufs creschia vinavant sco fin ussa dettia il ristg che las alps vegnian bandunadas, ha admonì Stefan Engler (Allianza dal Center/ GR). Cussegliers e cusseglieras dals Verds e da la PS han crititgà la lescha. La chatscha annuala na fetschia betg segn perquai ch’il focus na vegnia betg mess sin ils lufs problematics, ha ditg Daniel Jositsch (PS / ZH). Auters han accentua che la convivenza tranter luf, umans ed animals na vegnia betg promovida cun la nova lescha.
Critica da las Organisaziuns per l'ambient
Avant bundant in onn èn tut las organisaziuns che han pled en chaussa luf, sesidas vi dad ina maisa. E tgi avess pensà: Las discussiuns han purtà fritg. In cumpromiss pareva palpabel.
Tenor las organisaziuns per l’ambient è la proposta che vegn tractada oz en il Cussegl dals chantuns dentant dalunsch davent da quel cumpromiss.
Jau sun dischillusa che la proposta da la cumissiun dal Cussegl dals chantuns na resguarda betg il cumpromiss che nus avain fatg cun tut las organisaziuns involvidas.
Ins era sa cunvegnì da pudair regular il luf pli svelt ed era a moda preventiva. Las organisaziuns per l'ambient manegiavan cun quai da pudair sajettar pli svelt lufs era sch'els n'han anc betg fatg gronds donns. Percunter è per l’Uniun purila svizra l’interpretaziun da preventiv, da pudair regular ils lufs sco ils capricorns.
Quai vul dir ch’ins definescha onn per onn quants lufs ch'ins po dar liber per la chatscha. Quai n'è betg pli pauc, di il pli aut pur svizzer Markus Ritter.
Jau na tema betg in referendum. Jau sun segir che nus gudagnassan quel.
Er la gruppa da lavur per ils territoris da muntogna SAB, che era part da la maisa radunda, crititgescha la proposta actuala. Cun il nov reglament saja be pussaivel da sajettar lufs d'atun. I saja però necessari dad intervegnir durant ils mais da stad cura ch'i dat ils donns sin las alps, ha ditg il directur da la SAB Thomas Egger.
Organisaziuns da l'ambient ed ina part da la sanestra spera ch'il Cussegl naziunal, che tracta l’affar sco proxim, possia schluccar la revisiun. Uschiglio pudessi bain esser ch'i dat in referendum ed il pievel ha puspè l’ultim pled en chaussa.
Discussiuns dapi 2014
Il cusseglier dals chantuns Stefan Engler aveva inoltrà l'onn 2014 la proposta per midar la lescha da chatscha. Il pievel svizzer ha dentant refusà quella avant dus onns. Tge ch'el spetga da la segunda emprova, di Stefan Engler en l'intervista cun RTR.
