Siglir tar il cuntegn
cuntegn

Svizra Cussegl dals chantuns tira ils dents a la «Lex FIFA»

Il dretg penal da corrupziun na vegn betg midà pervia dal scandal actual da la FIFA. La Federaziuns internaziunala da ballape è bain stada il grond tema oz en il Cussegl dals chantuns, dentant ha quel gist era tratg ils dents da la uschenumnada «Lex FIFA».

Il Cussegl dals chantuns vi da sa fatschentar cun la lescha da corrupziun.
Legenda: Il Cussegl dals chantuns vi da sa fatschentar cun la lescha da corrupziun. Keystone

La finamira dal sboz è da pudair persequir meglier la corrupziun privata. Il Cussegl federal vul perquai che la corrupziun privata vegnia definida da nov en il cudesch penal sco fatg penal – pia sco in delict uffizial. Uschia na duvrassi betg mintgamai ina dumonda concreta per pudair persequir corrupziuns privatas.

Da principi n’è il Cussegl dals chantuns betg stà cunter quai, dentant sin dumonda da sia cumissiun ha il Cussegl dals chantuns fatg ina restricziun eminenta quai che pertutga il delict uffizial: Cun 22 cunter 23 vuschs ha il Cussegl dals chantuns decis da persequir la corrupziun privata be sin proposta, sche nagins interess publics vegnan violads u qua tras periclitads.

Evitar proceduras pervia da bagatellas

Christian Levrat (SP/FR) ha dentant avertì, che cun questa excepziun haja il sboz nagina valur pli e saja senza cuntegn. L’inquisitur na possia gea betg eruir l’interess public, sch’el na sappia betg anc ils fatgs.

La plipart dal Cussegl dals chantuns ha dentant vulì garantir, ch’i na dettia naginas proceduras penalas pervia da cas da bagatella. Sch’in emploià d’in pasterner sa lascha corrumper per ch’el cumpria in tschert furn, duai lura il schef decider sch’i duai dar ina procedura penala, ha ditg Primin Bischof (CVP/SO).

Per cas da bagatella datti gia excepziuns

Per da quels cas da bagatella dettia quai gia excepziuns en la lescha penala, ha ditg la ministra da giustia, Simonetta Sommaruga. Er ella ha fatg attent sin la problematica ch’i saja uschia grev da decider tge ch’è en l’interess public, avant d’avrir ina procedura penala.