Il Cussegl dals chantuns vul che firmas cun dapli che 100 collavuraturas e collavuraturs ston laschar analisar las pajas dad in post extern.
Cun quai ha il Cussegl dals chantuns approvà ina versiun pli lucca per il midament da la lescha d'egualitad sco quai ch'il Cussegl federal aveva proponì. Il Cussegl federal vuleva laschar analisar firmas cun 50 e passa collavuraturas e collavuraturs. Sco proxim debattescha il Cussegl naziunal davart il midament da la lescha d'egualitad.
La segunda emprova
Anc en la sessiun da primavaira aveva il Cussegl renvià la proposta a la cumissiun. Quella ha stuì examinar alternativas. Ella è dentant sa decidida da restar tar sia proposta.
En la constituziun exista l'egualitad
Dapi l'onn 1981 è l'egualitad tranter umens e dunnas scritta en la Constituziun federala - uschia era l'egualitad da pajas.
Ina part da l’inegualitad da las pajas po vegnir declerada cun la vegliadetgna, cun la scolaziun e cun ils onns da lavur. Sche la differenza è però pli gronda che 7,4 % na datti nagins arguments objectivs. Quai mussa in studi da l'Uffizi federal da statistica. En media gudogna ina dunna en in onn 7'000 francs pli pauc ch'in um. Tenor Simonetta Sommaruga è quai ina discriminaziun da las dunnas.
RR novitads 12:00
