L'iniziativa è vegnida inoltrada ils 21 d’october 2016 cun 113'216 suttascripziuns valaivlas. Quella prevesa che las zonas da construcziun na vegnan betg pli extendidas. Novas zonas da bajegiar duai quai be dar sch'ina surfatscha da la medema dimensiun e cun ina qualitad da terren cumparegliabla vegn prendida ord la zona.
Tras quai duessi esser pussaivel da cultivar il terren da bajegiar existent a moda pli effizienta. Plinavant prescriva l’iniziativa reglas davart in svilup dals abitadis a l’interiur, quartiers persistents e davart il bajegiar ordvart la zona da bajegiar.
Raschuns per il na
Il Cussegl federal parta bain ils interess impurtants da l’iniziativa dal pievel da la construcziun dischordinada. Dentant è el da l'opiniun che la lescha per la planisaziun dal territori actuala, tegnia gia quint ad in svilup d’abitadi persistent.
Il Cussegl federal è da l'avis che l’iniziativa na resguardia betg avunda il svilup demografic ed economic sco era las diversas relaziuns chantunalas u regiunalas. Uschia propona il Cussegl federal al parlament da refusar l’iniziativa.
RR novitads 12:00