A partir dal 2026 duain tuttas persunas pensiunadas survegnir ina 13avla renta d'AVS mintgamai il december – quai è la finamira dal Cussegl federal. Curt suenter che l'iniziativa èra vegnida acceptada aveva il Cussegl federal presentà duas variantas, co «la 13avla» duai vegnir finanziada. Quellas ha el uss tramess en la consultaziun, sco el ha communitgà.
Omisduas versiuns prevesan pia da finanziar «la 13avla» sur las pajas – cun auzar las contribuziuns per patruns e lavurers. L'emprima varianta duess tenor il Cussegl federal dar 3,8 milliardas francs dapli entradas per onn, a partir dal 2030. La segunda varianta in plus da 3,9 milliardas francs. La consultaziun da las duas versiuns cuzza enfin ils 5 da fanadur.
Plinavant vul il Cussegl federal deducir per in temp las contribuziuns da la Confederaziun a l'AVS – uschia vul el resguardar las finanzas limitadas da la Confederaziun. Actualmain paja lezza 20.2% da las expensas annualas da l'AVS. Quels custs vegnian tenor la communicaziun a crescher per 950 milliuns a partir dal 2030.