Siglir tar il cuntegn

Svizra Cussegl federal è avert per il sistem «Cargo sous terrain»

La regenza è averta per il sistem da transportar rauba al sutterren «Cargo sous terrain». Il Cussegl federal è pront da sustegnair in tal project privat cun ina lescha speziala, na sa participescha dentant betg finanzialmain.

Cun ina tala lescha speziala fissi pli lev da realisar il project «Cargo sous terrain» (CST). Surtut la fasa da planisaziun e concessiun pudess ir pli spert schi valess ina basa legala standardisada, enstagl da las differentas prescripziuns da construcziun chantunalas e communalas. Plinavant pudess la publicitad avair in «lev niz positiv» dal project CST, scriva il Departament federal per il traffic.

Cussegl federal fa pretensiuns

Ses sustegn lia il Cussegl federal dentant a cundiziuns. El pretenda che l'associaziun da promoziun «CST» vegnia midada en ina societad d'aczias. Ils purtaders duessan er garantir almain 100 milliuns francs, almain la mesadad da duess vegnir d'investurs svizzers.

Plinavant stuess vegnir reorganisada la logistica ed il transport en ils territoris pertutgads. Ils chantuns Turitg, Argovia e Soloturn, che fissan part da l'emprima etappa, stuessan esser d'accords e prender si il project en lur planisaziun da traffic regiunala.

Custs da 33 milliardas francs

L'emprima etappa duai vegnir averta l'onn 2030. Enfin l'onn 2045 duai il sistem lura vegnir extendì sin l'entira Svizra. Ils custs per l'entir sistem vegnan ad esser enturn 33 milliardas francs.

RR novitads 12:00

Sistem alternativ

«Cargo sous terrain» è in project da differentas interpresas dal commerzi en detagl, da la logistica ed d'ulteriuras branschas. Il project prevesa in sistem alternativ da transportar rauba cun vehichels autocharrants al sutterren.