En il titel sin lur account dad Instagram hajan els resguardà las trais linguas uffizialas – tudestg, talian e franzos – sco er l'englais. Suenter blers commentaris e reacziuns figureschia uss dentant er il rumantsch, uschia André Simonazzi.
La quarta lingua naziunala na saja dentant betg ida en emblidanza, i saja adina stà previs dad er communitgar per rumantsch.
André Simonazzi fa dentant er in appel a Rumantschas e Rumantschs: Dapi onns publitgeschia la Confederaziun per exempel las decleraziuns avant votaziuns per rumantsch e quellas fruntian sin plitost pauc interess.
Quai ha André Simonazzi ditg ad RTR a l'ur da la visita dal Cussegl federal en Val Müstair, nua ch'il post sin Instagram è propi vegnì fatg per rumantsch sco emprima lingua.
L'account dal Cussegl federal
Dapi ils 10 d'october communitgescha il Cussegl federal er via la media sociala Instagram. Sin questa plattafurma veglia el cunzunt cuntanscher persunas tranter 15 e 30 onns – ina gruppa che sa mova cunzunt sin chanals online, ha ditg Urs Bruderer da la Chanzlia federala envers Radio SRF. En pli saja er la finamira da cuntanscher persunas che na legian strusch gasettas u na guardian betg televisiun.
Sin instagram duai il focus esser sin videos e fotografias, er duai dar formats interactivs sco quizs. Il focus saja er en quests formats da trategniment dentant adina sin ils temas dal Cussegl federal. I na dettia betg istorgias privatas dals cussegliers e cusseglieras federalas, uschia Bruderer.
Suandar a Macron e Scholz sin Instagram
I vegnia spetgà dad acturs politics ch'els communitgeschian directamain cun la populaziun. Per quai haja la Confederaziun creà 10 novas plazzas da lavur per schlargiar la communicaziun en las medias socialas. Regenzas dad auters pajais sco il chancelier tudestg Olaf Scholz u il president franzos Emmanuel Macron han gia dapi in temp in agen conto sin Instagram.
