Il cusseglier naziunal da Fribourg Gerhard Andrey duess daventar l'emprim cusseglier federal dals Verds. La partida vul stgaffir cun el maioritads en chasa federala e far udida al clima. La fracziun dals Verds ha confermà venderdi uffizialmain sia candidatura per il Cussegl federal.
La presidenta da la fracziun Aline Trede ha ditg davant las medias a Berna che la fracziun haja prendì cleramain la decisiun. Andrey saja il «interprendider persistent en persuna» ed enconuschent en la chasa federala sco construider da punts. Ins possia stgaffir maioritads cun el.
El fiss era l'unic expert da digitalisaziun en il Cussegl federal, sch'el avess da vegnir elegì, ha ditg Trede vinavant. Sco figl da purs s'haja el perfecziunà e mainia ussa ina interpresa cun 200 impiegads ed impiegadas. Cun quai fiss el l'unic en il Cussegl federal cun experientscha da manar.
Questa candidatura è ina offerta a las autras partidas, ina offerta da viver la concordanza.
El haja gust da s'engaschar en la regenza federala per ina natira intacta, per ina societad solidarica, per in'economia circulara persistenta e per ina buna vita da las generaziuns actualas e vegnintas, ha ditg Andrey. La strategia dals Verds na sa drizzia betg cunter ina partida, ella fetschia valair ina pretensiun aritmetica e politica. In segund sez da la PLD en il Cussegl federal na saja betg da giustifitgar.
