Siglir tar il cuntegn

Header

video
Il Cussegl federal schlucca ferm las reglas da corona
Or da Telesguard dals 27.05.2020.
laschar ir
cuntegn

Cussegl federal ha decis Grond pass da schluccadas ils 6 da zercladur

Grazia al grond sustegn da la populaziun saja reussì da dumagnar sut controlla il viurs en Svizra, uschia la presidenta da la Confederaziun Simonetta Sommaruga. E perquai ch'igl ha dà mo paucas novas infecziuns, ha il Cussegl federal decis da far in grond pass vers la normalitad.

Curt e cumpact las pli impurtantas midadas:

Grafica cun schluccadas per 6 da zercladur
Legenda: RTR Grafica

A partir dals 15 da zercladur avran era ils cunfins cun la Germania, l'Austria e la Frantscha.

Vinavant scumandà: Inscunters da passa 30 persunas en il spazi public, occurrenzas cun passa 300 persunas, concurrenzas da sport cun contact corporal.

L'infurmaziun è a fin, qua il video:

Qua pass per pass ina resumaziun da la conferenza a Berna:

Il ticker è a fin

  • 16:37

    Adia

    La runda da dumondas è a fin e cun quai piglia cusseglier federal Alain Berset anc ina giada il pled. I saja ina partenza en ina nova etappa per Daniel Koch. El giaja cun il di dad oz a en pensiun. Alain Berset engrazia fitg ad el per sia ruassaivladad e tut la lavur durant blers onns en l'Uffizi federal da sanadad. Ed el sa smirveglia anc oz, co Daniel Koch haja fatg quai da vegnir a mintga termin da medias cun in'autra cravatta.

    Suenter che Daniel Koch ha engrazià a tut ses collavuraturs ed al Cussegl federal serra il vice-chancelier André Simonazzi la conferenza da medias.

    video
    Koch: «Igl è stà in'onur da dastgar servir al Cussegl federal»
    Or da News-Clip dals 27.05.2020.
    laschar ir
  • 16:31

    Tgi dovra sgols gia avant ch'ils cunfins èn averts?

    In schurnalist vul savair tgi che po duvrar sgols p. ex. en u da l'Italia che vegnan purschids avant ch'ils cunfins vegnan averts? Karin Keller-Sutter pecisescha che tranter auter lavurants u er Svizzers e Svizras han gia durant la pandemia pudì p. ex. turnar da l'exteriur en Svizra. Quels possian er uss p. ex. turnar cun in sgol a partir dal mument che l'Italia lascha extrar persunas. Plinavant sajan las societads aviaticas firmas privatas che possian porscher sgols cura ch'ellas veglian. Sin quai n'haja il Cussegl federal nagin'influenza.

  • 16:26

    Dretgs politics

    A partir da l’emprim da zercladur èsi puspè pussaivel da rimnar suttascripziuns per referendums ed iniziativas, declera il vice-chancelier André Simonazzi. Natiralmain era qua sut la cundiziun che las reglas da distanza vegnan resguardadas. Enfin la fin da matg èn ils termins per iniazitivas anc schelads en.

  • 16:20

    Sortida vinavant be fin mesanotg

    Tenor Alain Berset n'hajan ins betg abolì questa mesira per betg periclitar tut ils sforzs da fin uss. Il ristg ch'ins emblidia da tegnair distanza u er las reglas d'igiena pli ditg che la sortida giaja, quel saja memia grond. Ma la finamira saja dad er schliar questa regla uschè svelt sco pussaivel.

  • 16:11

    Distanza u contact-tracing?

    Tge vala uss en la bar u en la disco sco emprim? Èsi da tegnair distanza u da garantir ch'ins possia recontruir ils contacts. Tenor il Cussegl federal èsi qua il pli impurtant da garantir ch'ins possira recontruir tgi che saja stà cura en il local.

    Simonetta Sommaruga agiunta ch'ins sa chattia uss en ina fasa transitorica. Uss giaja per surdar pli e pli fitg la responsabladad a mintgina e mintgin. Ma il monitoring giaja vinavant. E sch'ins vesia ch'i detti insanua problems, saja impurtant da pudair reagir là. Perquai tegnair distanza nua che quai è pussaivel e pudair dir, tgi che saja sta cura, nua.

  • 16:05

    Co statti cun chantar en il chor?

    Tenor Simonetta Sommaruga saja quai in bun exempel che mussia: Uss na vai betg per la dumonda sche quai saja lubì a partir dals 6 da zercladur, mabain co quai vegnia fatg? I giaja per tegnair en las distanzas uschè bain sco pussaivel e pudair reconstruir ils contacts en il cas d'ina infecziun. Quai valia er per autras activitads d'uniun sco societads da musica.

  • 16:01

    Tge capita sch’i dat puspè dapli cas?

    Natiralmain che la Confederaziun tegnia vinavant en egl las cifras, declera Daniel Koch. Sch’i dess puspè dapli infecziuns novas dal coronavirus, lura stuain nus analisar daco e nua ed eventualmain prender mesiras. En questa fasa uss durant la stad saja impurtant da pudair identifitgar mintga persuna infectada.

    video
    Koch: «Sch'il trend sa midass, fissi da tschertgar raschuns...»
    Or da News-Clip dals 27.05.2020.
    laschar ir
  • 16:00

    Datti chastis sch'insatgi na sa tegn betg vid las reglas?

    Sin questa dumonda respunda Alain Berset ch'i saja vinavant pussaivel da chastiar sch'insatgi na sa tegn betg vid las reglas. Ils chantuns hajan la cumpetenza da far controllas. Ma il Cussegl federal partia era dal fatg ch'i saja en l'interess da tuts e cunzunt er dals interprendiders che las mesiras da protecziun vegnian realisadas ed er respectadas per evitar ina segunda unda d'infecziuns.

  • 15:56

    Sport vs. erotica

    Daco n’èn occurrenzas da contact corporal (p. ex. lutga) betg lubidas – locals d’erotica pon dentant avrir? Questa dumonda d’in schurnalist fa surrir il minister da sanadad Alain Berset. El cuntinuescha serius: Survetschs d’erotica hajan gì lieu era sch’ils locals sajan stads serrads, perquai saja uss impurtant da pudair avrir quels – era per avair dapli segirtad per las dunnas.

    video
    Berset: «Igl è impurtant da puspè lubir quests servetschs»
    Or da News-Clip dals 27.05.2020.
    laschar ir
  • 15:54

    Co far cun las distanzas tar ina occurrenza?

    Suenter che Alain Berset ha punctuà che tegnair distanza saja insatge dal pli impurtant er vinavant, vul in schurnalist savair co far quai durant ina occurrenza p. ex. cun 300 persunas. Tenor Alain Berset èsi cler ch'i na saja p. ex. tar ina nozza betg l'idea d'avair tranter mintga giast adina ina distanza da dus meters tar l'auter. Ins veglia gea era sautar. Ma decisiv saja qua d'avair la glista da giasts uschia ch'ins pudess reconstruir ils contacts.

  • 15:45

    N'èsi betg naiv da sa fidar sin l'atgna responsabladad?

    In schurnalist dumonda sche quai na saja betg naiv dad uss simplamain sa fidar che tuts elavurian concepts e la glieud sa tegnia lura er vi da quels senza pli grondas controllas e senza prescriver tut. Simonetta Sommaruga manegia ch'i saja uss temp dad ir pli e pli fitg en questa direcziun. E cler, dovria sco dapertut buns exempels e tranter en probabel er in u l'auter schlet nua ch'i na funcziunia betg. Ma il Cussegl federal na veglia uss betg pli prescriver mintga pass.

    Uss essan nus uschè lunsch che nus avain fidanza en la populaziun ed en l’economia.
    Autur: Simonetta Somarugapresidenta da la Confederaziun
  • 15:40

    Cunfins averts a partir dals 15 da zercladur

    Sin dumonda d'ina schurnalista fa Karin Keller-Sutter cler ch'ils cunfins cun la Germania, Frantscha e l'Austria vegnian averts cumplettamain e per tuts a partir dals 15 da zercladur. Quai cumpeglia sa chapescha er possessurs da chasas u abitaziuns da vacanzas en quest pajais.

  • 15:37

    Pon ins organisar champs da stad?

    Gea è la resposta d'Alain Berset sin la dumonda d'in schurnalist. Fin a 300 persunas cun in concept da protecziun correspundent saja quai pussaivel.

  • 15:35

    Impurtant da pudair reconsturir ils contacts

    Tant Alain Berset sco er il delegà da l'Uffizi federal da sanadad Daniel Koch accentueschan sin ina dumonda d'in schurnalist ch'i saja impurtant da pudair reconstruir las chadainas da contact. Perquai èn inscunters spontans senza in organisatur che ha la controlla lubids be fin a 30 persunas. Auter tar occurenzas organisadas sco en il sport, concerts, teater u er kino nua ch'igl è pussaivel che tuts ston s'annunziar u reservar plazs.

    Il medem valia era per las mesiras en las ustarias. Uschè spert ch'i haja dapli che quatter persunas vid ina maisa u er tar ina societad da festa, stoppia insatgi inditgar las datas da contact. Be uschia sa laschian las chadainas da contact reconsturir sche necessari. La regla da dus meters distanza tranter las maisas valia vinavant. Quai per evitar che gruppas da giasts sa maschaidian.

    video
    Berset: «Nua ch'i dat contact pli stretg dovri contact-tracing»
    Or da News-Clip dals 27.05.2020.
    laschar ir
  • 15:25

    En contact cun l'Italia

    Karin Keller-Sutter accentuescha che la Svizra na vegnia betg ad avrir ses cunfins cun l'Italia gia ils 3 da zercladur. La decisiun d'avrir haja l'Italia piglià en atgna reschia. Ins saja però sa cunvegnì da coordinar ils proxims pass fin l'avertura dals cunfins.

    video
    Keller-Sutter: «La Svizra n'avra anc betg ils cunfins...»
    Or da News-Clip dals 27.05.2020.
    laschar ir
  • 15:20

    Ulteriuras schluccadas als cunfins

    A partir dals 8 da zercladur vala tranter auter :

    • Studentas e student da pajais esters dastgan puspè entrar en Svizra.
    • Dumondas per lavurants qualifitgads da l’exteriur vegnan puspè tractadas ed er lubidas.
    • Famiglias da l’exteriur dastgan puspè suandar a lur parents che vivan en Svizra.
    • Per persunas ord pajais da ristg poi dar mesiras als cunfins sco p. ex. mesirar la temperatura u mesiras da quarantina.

    Fin ils 6 da fanadur è la finamira da reintroducir la libra ciruclaziun da persunas en l’entira UE resp. cun ils pajas dal spazi da Schengen. Vul dir: Lura èn ils cunfins svizzers puspè averts per questas persunas. Quella reavertura duai succeder pass per pass a partir dals 15 da zercladur.

  • 15:18

    Responsabladad tar mintgin e tar fatschentas

    Alain Berset fa attent che las schluccadas na capitan betg senza cundiziuns:

    • stizuns, fatschentas, purschidas turisticas... – tuts dovrian in concept da protecziun
    • nua ch'i dettia contacts stretgs stoppia quai esser pussaivel da reconsturir las chadainas da contact
    • vinavant ed uss cun las ulteriuras schluccadas anc pli fitg saja mintgina e mintgin responsabel ch'i giaja uschia vinavant sco fin qua cun las cifras d'infecziun
  • 15:15

    Gruppa da ristg

    Ins possia dir cleramain che questas persunas possian turnar a la vita normala en la situaziun acutuala, di Alain Berset. Sa chapescha cun resguardar las mesiras da protecziun sco distanza ed igiena. Tat e tatta possian però puspè guardar da lur biadis.

    Persunas pli veglias e da las gruppas da ristg sajan stadas fitg disciplinadas. Uss saja pussaivel da far in proxim pass. La vita cumenzia puspè a girar, uschia Alain Berset vinavant.

    video
    Berset: «Persunas vulnerablas pon puspè participar a la vita»
    Or da News-Clip dals 27.05.2020.
    laschar ir
  • 15:12

    Daco ils 6 da zercladur e betg sco annunzià ils 8 da zercladur?

    Decisiv saja stà qua l'argument ch'i na sa tractia betg mo da stizuns, mabain da purschidas turisticas sco campadis, pendicularas, bogns, bogns averts euv., ha ditg il minister da sanadad Alain Berset.

    A partir dals 6 da zercladur n'è il dumber da giasts per maisa en l'ustaria betg pli limità. Ina persuna per maisa sto però inditgar las datas da contact per pudair reconsturir ils contacts.

  • 15:06

    Avertura gronda gia ils 6 da zercladur

    • Inscunters spontans èn lubids cun fin a 30 persunas (gia a partir dals 30 da matg)
    • Tut las occurenzas fin a 300 persunas èn puspè lubidas.
    • Tut las instituziuns e manaschis dal temp liber sco era purschidas turisticas dastgan puspè avrir.

RTR novitads 15:00

Artitgels legids il pli savens

Scrollar a sanestra Scrollar a dretga