«Il stadi n'è betg in'assicuranza da casco cumplaina»
Il Cussegl federal ha augmentà il volumen da garanzias per gidar las interpresas en stretgas da liquiditad per ulteriuras 20 milliardas. En tut stattan uss a disposiziun 40 milliardas per credits, quai ha declerà il minister da finanzas Ueli Maurer. Las bancas svizras hajan enfin uss elavurà 76'000 dumondas per credits. Per prevegnir ad abus intensivescha la Confederaziun ses mecanissems da controlla.
16 sgols èn turnads cun 3'700 persunas
Enfin il di dad oz ha il Departament federal per affars exteriurs purtà a chasa bun 3'700 persunas, da quellas èn 2'100 Svizras e Svizzers ch'eran a l'exteriur. Sco Ignazio Cassis il minister per l'exteriur ha ditg, vegnia quai a dar enfin dumengia tschintg ulteriuras acziuns per returnar persunas a chasa.
Cassis ha accentuà che la collavuraziun internaziunala saja fitg impurtanta en temps da crisa. Uschia possian ils pajais profitar in da l'auter. Per exempel tractia la Svizra il mument 40 pazientas e pazients da la Frantscha.