Cussegl federal - La Svizra duai sa preparar meglier per novs privels
Per che la Svizra restia vinavant in pajais segir, dovria ulteriuras stentas. Il rapport davart la politica da segirezza numna novs privels, sco per exempel attatgas da cyber e dischinfurmaziun statala, e mussa er co cumbatter questas sfidas.
Il davos rapport datescha dals 24 d'avust 2016. Dapi lura saja sa midà bler, ha ditg cussegliera federala Viola Amherd avant las medias. En Svizra dettia novas sfidas e privels, senza ch'ils vegls privels sajan svanids, uschia il rapport. L'effect da protecziun dal conturn geografic e politic da la Svizra saja sa reducì ils ultims onns.
Rapport davart la politica da segirezza
Avrir la boxSerrar la box
Il Cussegl federal ha avert la consultaziun davart il rapport da la politica da segirezza. La consultaziun cuzza enfin il 18 d'avust. Anc avant la fin da l'onn vul la regenza surdar quel al parlament. Il rapport mussa las prioritads che duain valair per la politica da segirezza en Svizra.
Per il Cussegl federal èn per exempel attatgas da cyber e fake news fenomens che sajan sa sviluppads ad in privel per il stadi, l’economia e la societad.
Perquai stoppia la Svizra adattar sia politica da segirezza a talas smanatschas. Quai na veglia dentant betg dir, ch'ins dastgia negliger auters privels.