Siglir tar il cuntegn
Inhalt

Svizra Cussegl federal lubescha da sajettar lufs giuvens

Animals giuvens ord in triep da lufs pon vegnir sajettads davent mez fanadur, quai sut tschertas circumstanzas. Il Cussegl federal ha revedì la lescha da chatscha federala.

In dals lufs dal Calanda.
Legenda: In dals lufs dal Calanda. archiv/uffizi da chatscha e pestga dal Grischun

Tenor l’Uffizi federal per l’ambient vivan oz en Svizra radund 25 lufs, numnadamain 10 fin 15 lufs singuls ed in triep da 8 fin 10 lufs al Calanda. Las davosas emnas avevan lufs stgarpà pliras nursas en ils chantuns Sur- e Sutsilvania, Vallais ed Uri. La regenza uranaisa aveva lubì da sajettar in luf. Cun reguard al triep da lufs al Calanda saja quai necessari da reglar pli clar cura ch’ì è pussaivel da sajettar in luf.

Sajettar lufs giuvens en in triep

Lufs giuvens dastgan vegnir sajettads be

  • cun lubientscha da l’Uffizi federal da l’ambient
  • sch’els han stgarpà en lur intschess almain 15 animals da niz aifer 4 mais
  • sch’ins ha prendì mesiras per proteger ils animals da niz.

Plinavant dastgan lufs giuvens era vegnir sajettads, sch’els sa chattan regularmain a l’ur da vitgs ni en vitgs e mussan nagina tema. Animals creschids duajan vegnir schanegiads.

Sajettar lufs singuls

En ils cas da lufs singuls po en l’avegnir il chantun giuditgar sch’in luf ha stgarpà memia blers animals da niz; mo lura dastga il luf vegnir sajettà. Las reglas da l’uschenumnà concept luf vegnan surpigliadas per gronda part en la constituziun.

Extender il spazi d’agir - la moziun Engler

Il mars 2014 aveva Stefan Engler inoltrà ina moziun che pretenda in spazi d’agir pli vast tar la regulaziun dal luf. Sper la protecziun dal luf e la diversitad da spezias duajan era vegnir risguardads

  • ils interess tar il niz agrar da mises ed alps
  • il diever da chatscha tenor lescha
  • la segirtad publica
  • ed ils interess turistics.

La moziun è vegnida acceptada dal Cussegl dals chantuns e sa chattà actualmain en lavur.

RR novitads 15:00