Plirs millis malsauns che pateschan per exempel da cancer u da Multiple Sclerose (MS), prendan cannabis. Per ch'els possian far quai, sto l'uffizi federal per sanadad dar ina lubientscha speziala. Il 2018 ha el concedì radund 3'000 da quellas lubientschas.
Effect n'è betg cumprovà bain avunda
Sche medicaments cun cannabis han in effect n'è ternor l'Uffizi federal da sanadad betg cumprovà bain avunda. Perquai na surpiglian las cassas er betg automaticamain ils custs. Da midar quai n'è betg il senn da questa proposta, scriva l'uffizi.
Il Cussegl federal vul scleriment en chaussa ed ha perquai lantschà in project d'evaluaziun. Quel duai mussar sche l'effect da cannabis tanscha per obligar las cassas da malsauns da pajar tals tractaments. Plinavant duai l'evaluaziun er mussar tar tge malsognas ch'il cannabis fa senn.
Medicaments cun cannabis èn chars
Perquai ch'ils medicaments cun cannabis èn chars, pon els custar plirs tschient francs il mais. Perquai dettia pazientas e pazients che terapeschian sa sez cun cannabis ch'els survegnan sur la via illegala. La lescha d'ozendi na correspundia perquai betg pli al temp ed als basegns da malsauns, scriva l'Uffizi federal per sanadad.
Cannabis è scumandà en Svizra gia dapi il 1951. Il Cussegl federal vul scriver ina clausula d'experimentar en la lescha.
RR novitads 11:00