Siglir tar il cuntegn

Svizra Cussegl federal na mida betg ses plan per cumbatter lavur naira

Malgrà la critica en la consultaziun resta il Cussegl federal resta tar ses plans per cumbatter la lavur naira. El desista dentant da la nova regla da reparter ils custs tranter la Confederaziun ed ils chantuns, uschia communitgescha il Cussegl federal.

in um porta ina tavla da laina
Legenda: Radund 45 milliardas francs è la cumpart da la lavur naira vid l'economia. (maletg simbolic) Keystone

Quella regla aveva la finamira d'animar ils chantuns da far dapli cunter la lavur naira. La Confederaziun avess sa participà pli pauc vid ils custs da paja dals inspecturs chantunals, persuenter n'avessen ils chantuns betg pli stuì parter cun la confederaziun las taxas e multas incassadas.

La proposta è fruntada sin grond'opposiziun. 17 chantuns, la PLD, la PPS, l'Uniun sindicala e la federaziun dals patruns han refusà la midada. Sco mesira la pli impurtanta prevesa il Cussegl federal da rinforzar la collavuraziun tranter ils uffizis.

Fin la fin da l'onn ha il departament d'economia d'ellavurar il messadi. En il parlament pudess la fatschenta esser cumbattida fitg. Entant che las partidas burgaisas averteschan da memia blera birocrazia èn las partidas da la sanestra dal maini ch'il sboz saja senza curaschi.

Che la lavur naira sto vegnir cumbattida n'è betg dispitaivel. Quasi tuts èn dal maini che la lavur naira fa gronds donns a l'economia. Tenor in studi ha la cumpart da la lavur naira fatg ora 6,9% vid la prestaziun economica totala. Quai èn radund 45 milliardas francs.

RR novitads 14:00