Siglir tar il cuntegn
Inhalt

Svizra Cussegl federal na schlucca betg l'export d'armas

El desistia da schluccar l'export, ha decidì il Cussegl federal. I manchia il sustegn politic, uschia ha l' argument. Las gasettas 24heures e Tribune de Genève han rapportà ch'il minister d'economia Johann Schneider-Ammann veglia reponderar la schluccada planisada per exports dad armas.

Portrait.
Legenda: Gist uss betg propi bun da continuar cun la liberalisaziun – Johann Schneider-Ammann tar la tematica da l'export dad armas (qua en la sessiun d'atun 2018). Keystone

Suenter critica intensiva ha Johann Schneider-Ammann annunzià via duas gasettas romandas da vulair suttametter al Cussegl federal ina proposta per suspender la fatschenta.

Uschia vegn il minister d'economia federal cità en las gasettas 24heures e Tribune de Genève:

Nus avain discutà bler ed essan vegnids a la conclusiun ch'i na saja ni fitg intelligent ni fitg realistica da cuntinuar gist ussa cun il process da liberalisaziun.
Autur: Johann Schneider-Ammannminister d'economia federal

I saja veramain da studegiar «las cundiziuns actualas sin ils martgads ed analisar las consequenzas dad ina tala liberalisaziun» sa lascha el citar en gasetta. Tar questa conclusiun haja «la pressiun da l'exteriur giugà ina rolla», di Johann Schneider-Ammann a las gasettas.

Il president da la Cumissiun per la politica da segirezza dal Cussegl naziunal è surprais da la proposta dal cusseglier federal Johann Schneider-Ammann da forsa tuttina betg schluccar l’export d’armas. Per in’armada credibla stopp’ins sustegnair l’industria da defensiun svizra.

Cussegl naziunal as aveva gia miss per travers

Il Cussegl federal aveva previs da laschar exportar armas en pajais cun guerras civilas cun la resalva sch'i saja segir che las armas na vegnissan betg duvradas en il conflict intern.

Questa decisiun aveva levà tanta pulvra ch’il Cussegl naziunal ha tractà la tematica sco debatta urgenta en sia sessiun d'atun. Il resultat: Il Cussegl naziunal vuleva cun 97:82 vuschs (11 abstenziuns) prender al Cussegl federal l’autonomia da decider.

RR novitads 06:00+