Siglir tar il cuntegn

Header

cuntegn

Cussegl federal Nagina limita da persunal en l'administraziun federala

Il Cussegl federal na vul betg limitar il dumber da plazzas en l'administraziun federala ed era betg ils custs da persunal. Perquai propona il Cussegl federal al parlament, da refusar ina moziun da la cumissiun da finanzas dal Cussegl naziunal.

La moziun pretenda...

Avrir la box Serrar la box

... ch'il dumber da collavuraturs en l'administraziun federala vegnia limitada sin 37'500 pensums cumplains e ch'ils custs per il persunal vegnian limitads sin 6 milliardas francs. Quai correspunda circa al stan actual. La cumissiun pretenda ch'il creschament ferm da persunal tar la Confederaziun stoppia vegnir franà.

La moziun impediss da realisar tscherts duairs, scriva il Cussegl federal. Vitiers vegnia il preventiv global per il sectur dal persunal sutminà ed uschia era la flexibilitad atgnamain giavischada. Il Cussegl federal declera dentant ch'el veglia vinavant sa spruvar da tegnair stabil il dumber da plazzas. Novas plazzas vegnian cumpensadas tant sco pussibel cun desister da plazzas veglias. Il Cussegl federal stoppia dentant vinavant esser abel d'auzar il dumber da plazzas, sch'i dettia novs pensums dal parlament u svilups betg previsibels.

Il parlament è gia ina giada s'exprimì per franar il dumber da plazzas tar la Confederaziun. Il parlament ha dentant scrit giu questa moziun sco ademplida, quai dentant cunter l'avis dal Cussegl naziunal. La nova moziun da la cumissiun dal Cussegl naziunal va uss anc pli lunsch.

RTR novitads 15:00

Artitgels legids il pli savens