En pli vul il Cussegl federal stgaffir in nov secretariat da stadi per il nov uffizi. Quel duai elavurar e coordinar las basas strategicas per sviluppar la politica da segirtad. La guerra en l'Ucraina mussia ch'en conflicts d'ozenzdi vegnia duvrà dasper ils meds militars er dischinfurmaziun, squitsch, attatgas da cyber ed operaziuns zuppadas. Perquai saja impurtant da betg restrenscher la politica da segirtad mo sin defensiun, mabain dad er rinforzar la sparta civila. Cun in secretariat da stadi vul il Cussegl federal far la segira da pudair reagir flexibel sin svilups da la politica da segirezza.
Enfin la fin da l'onn duai il Departament federal da defensiun, protecziun da la populaziun e sport VBS elavurar la basa legala. Fin lura duai l VBS er elavurà in portfolio detaglià da las lavurs dal secretariat da stadi.
Uffizi federal per criminalitad da cyber
La Svizra survegn in Uffizi federal per segirtad da cyber. Cun l'entschatta da l'auter onn vegn l'actual Center naziunal per segirtad da cyber transfurmà en in uffizi federal. Plinavant vegn quel transferì dal departament da finanzas en il departament da defensiun. Quai ha il Cussegl federal decidì. Il budget da 13,7 milliuns francs duai vegnir auzà per 0,8 milliuns francs.