Siglir tar il cuntegn

Header

cuntegn

Cussegl Federal Ovra electrica da reserva duai vegnir a la rait il favrer

L'ovra d'energia da reserva cun otg generaturs duai esser pronta mez favrer. Quai ha communitgà General Electric Gas Power il glindesdi. Questa ovra duai producir electricitad en cas d'urgenza.

Il plan da temp è pulit sportiv, ha declerà il responsabel per il project Christian Verhoeven. El è dentant da buna speranza che tut gartegia e che l'ovra stat fin sin il termin. I vegnia lavurà fitg stretg cun l'Uffizi federal per energia. Tenor i contract cun l'uffizi duai l'ovra esser pronta sin ils 15 da favrer. L'ovra a Birr duai esser a disposiziun fin circa l’onn 2026

L'ovra da reserva da gas duai avair 8 turbinas ed er funcziunar cun ieli ed idrogen en cas d'ina mancanza da gas. Ella vegn ad avair ina prestaziun da 250 megawatts – quai ch'è circa in quart da l'ovra atomara Leibstadt. Ils custs per tut il temp da manaschi èn tenor la Confederaziun 470 milliuns francs.

Cumenzà cun la construcziun

Las lavuras da construcziun per l'ovra da reserva a Birr (AG) han cumenzà. Quai è stà pussaivel uschè spert, perquai ch'il Cussegl federal ha decis dad evitar la procedura da permissiun ordinaria, e pussibilitar in permis accelerà sin basa da la lescha da provediment dal pajais.

audio
Per tadlar: curt e cumpact
ord RTR Audio dals 23.09.2022.
laschar ir. Durada: 40 Secundas.

Il 2020, in onn suenter che l'ovra atomara Mühleberg è vegnida messa giu, aveva la Confederaziun planisà da construir ovras da gas da reserva per garantir la segirezza dal provediment cun energia. Pervi da la situaziun actuala sin il martgà d'energia vul la Confederaziun accelerar la construcziun da quellas.

RTR novitads 12:00

Artitgels legids il pli savens

Scrollar a sanestra Scrollar a dretga