Siglir tar il cuntegn

Header

Navigaziun

Legenda: Tadlar il audio Saira: Persunas cun problems psichics duain survegnir pli simpel ina terapia. Durada 03:42 minutas.
Or da Actualitad dals 26.06.2019.
cuntegn

Cussegl federal Persunas cun problems psichics duain survegnir pli simpel terapia

Surtut uffants e giuvenils sco era creschids en situaziuns da crisa duain survegnir pli svelt ina psicoterapia. Perquai na duain psicoterapeuts psicologics betg pli stuair agir sut la surveglianza d'in medi. Els duain esser abels da lavurar independentamain sin cumond d'in medi.

Il Cussegl federal ha tramess en consultaziun ina tala proposta. Per pussibilitar in meglier access a psicoterapias vul la regenza midar il sistem. En l'avegnir duain ils psicoterapeuts pudair far lur servetsch sin basa da l'assicuranza da malsauns obligatorica. Cundiziun è ch'in psicoterapeut ha las qualificaziuns correspundentas, in'autorisaziun da pratitgar la professiun sco era l'ordinaziun d'in medi u ina media. Uschia saja quai era gia il cas tar la fisioterapia. Tar la federaziun svizra da psicologas e psicologs èn ins levgià dal midament.

Nus investin en umans. Quai per ch'i va meglier cun las persunas e ch'ellas pon turnar a lavurar e na ston betg retrair l’assicuranza d’invaliditad en l'avegnir.
Autur: Samuel RomFederaziun svizra da psicologas e psicologs

Ozendi vegnan las prestaziuns be surpigliadas da la cassa da malsauns obligatorica sche la terapia vegn fatga sut surveglianza ed en las stanzas d'in medi. Quest model è stà patratgà sco model transitoric enfin ch'i dat ina scolaziun per psicologs ch'è armonisada naziunal. Quai è capità il 2013.

Pli paucas stretgas

Entras la midada pudessan stretgas vegnir sminuidas tar uffants, tar giuvenils sco ra creschids en situaziun da crisa. L'access pussibilitescha ch'ins po ir pli baud per agid. Disturbis psichics tutgan tar las malsognas ch'i dat il pli savens.

Consequenzas finanzialas

Sin fundament da stimaziuns va il Cussegl federal da quai ora ch'i dat custs da radund 100 milliuns francs che vegnan oz pajads dals pazients, vegnissan en l'avegnir quintads giu sur la cassa da malsauns.

Las premias vegnan a crescher anc pli fitg cun quest midament. Quai vulain nus evitar.
Autur: Verena NoldDirectura Santésuisse

A lunga vista pudessan quests custs anc crescher, perquai che la purschida vegn probabel er a crescher. Quai fa mal il venter a Santésuisse, l’organisaziun da las cassas da malsauns. Per evitar ch'i dat tuttenina memia blers custs, duai vegnir installà in monitoring scriva il Cussegl federal.

RR novitads 17:00