Il Cussegl federal ha deliberà la lescha il venderdi per mauns dal parlament. La lescha cuntegn da nov finamiras liantas e prevesa da prolungar ils instruments da promoziun actuals. Vitiers vul il Cussegl federal novas ovras electricas d'accumulaziun.
In'ulteriura finamira è d'avrir il martgà da forza electrica dal tut. L'incumbensa per la midada sin il sectur da l'energia aveva la populaziun decis il 2017. Quai cun il gie a la strategia d'energia 2050.
Liberalisaziun dal martgà da forza electrica
Tenor il Cussegl federal rinforza la liberalisaziun cumpletta dal martgà da forza electrica la producziun d'energia regenerabla. Ella portia dapli innovaziun. Il consument survegnia dapli libertads.
Chasadas ed auters consuments pitschens, prevesa il Cussegl federal da proteger d'abus da pretsch. Per quest intent duai er en il futur dar in tschert provediment da basa.
Produciders d'energia beneventan la direcziun
Ils produciders d’energia beneventan la direcziun da la lescha federala.
Ma ella na va betg avunda lunsch. Uschia è l’uniun dals produciders d’energia independents da l’avis – che l’avertura dal martgà da forza electrica planisada na gidia betg a render pli svelta la midada en il sectur da l’energia.
Ed era tenor la fundaziun per l’energia svizra ston ins sviluppar pli svelt l’energia renovabla. L’Axpo da sia vart deplorescha ch’ils gronds implants idraulics na vegnian pli sustegnids.
