Siglir tar il cuntegn
Inhalt

Svizra Cussegl federal refusa iniziativa da tgira

Il Cussegl federal sustegna bain la finamira dals iniziants e las iniziantas, per rinforzar la tgira tanschia dentant l'artitgel existent da la Constituziun. Il Cussegl federal refusa per consequenza l'iniziativa senza cuntraproposta.

Mauns da tgirunza cun apparat da mesirar pressiun da saung.
Legenda: Il Cussegl federal refusa l'iniziativa da tgira senza cuntraproposta. Keystone

Gia la primavaira aveva il Cussegl federal refusà quella dumonda dal pievel. Il medem mument aveva el incumbensà il departament da l'intern dad elavurar in plan da mesiras per la tgira.

En general sustegnia el la finamira dals iniziants e las iniziantas da rinforzar la tgira, scriva il Cussegl federal en sia missiva al parlament. Perquai haja el er examinà bain ina cuntraproposta. El saja però vegnì a la conclusiun che l'artitgel existent bastia per promover la tgira.

La tgira saja in – er sche betg numnà explicit – element integral dal provediment da basa medicinal, argumentescha il Cussegl federal. Dentant na vul el nagina posiziun speziala d'ina gruppa da professiun en la Constituziun.

La finamira da l'iniziativa

Cun l'iniziativa dal pievel «Per ina ferma tgira» vul la federaziun professiunala dals spezialists e las spezialistas da tgira evitar ina mancanza da persunal en la tgira. Uschia duai vegnir fixà en la Constituziun che chantuns e Confederaziun promovian la tgira sco element impurtant dal provediment da sanadad.

Ultra da quai duai er l'attractivitad da las professiun en la tgira vegnir auzada. La Confederaziun duaja guardar, ch'il persunal da tgira vegnia pajà gist per lur servetschs e che las relaziuns da lavur sajan adequatas a las pretensiuns.

RR novitads 15:00