Siglir tar il cuntegn

Header

cuntegn

Svizra Cussegl federal rinforza sustegn per pressa locala e regiunala

Il Cussegl federal ha fixà il rabat per la spediziun da gasettas e revistas regiunalas. Per las gasettas localas e regiunalas munta il rabat a total 25 raps pro exemplar - pia 2 raps dapli che fin ussa.

Il dumber da las gasettas ch'han il dretg da profitar da quest sustegn va enavos. Cumpareglià cun l'onn passà èn vegnids sustegnids 3,4 milliuns exemplars damain. Quai communitgescha l'Uffizi federal per communicaziun. En tut profiteschan 142 titels da la promoziun indirecta da la pressa.

En il Grischun è quai las gasettas regiunalas:

  • «Engadiner Post/Posta ladina» (editura: Stamparia Gammeter)
  • «La Pagina da Surmeir» (editura: Uniun rumantscha da Surmeir)
  • «Prättigauer und Herrschäftler» (editura: Stamparia Schiers)
  • «Aroser Zeitung» (editura: Somedia Publishing)
  • «Davoser Zeitung» (editura: Somedia Publishing)
  • «Novitats» (editura: Somedia Publishing)
  • «Pöschtli» (editura: Somedia Publishing)
  • «Prättigauer Post (Klosterser Zeitung)» (editura: Somedia Publishing)
  • «Ruinaulta» (editura: Somedia Publishing)
  • «Bündner Tagblatt» (editura: Somedia Publishing)
  • «Südostschweiz Graubünden» (editura: Somedia Publishing)
  • «La Quotidiana» (editura: Somedia Publishing)

Lev dapli sustegn per pressa da commembers e fundaziuns

En la categoria «pressa da commembers e fundaziuns» auza il Cussegl federal il sustegn per 1 rap pro exemplar - en tut munta il rabat pia a 15 raps pro exemplar. Era qua è il dumber dals titels ch'han il dretg dal sustegn sa reducì. Actualmain èsi 1'066 titels (-53 titels). IL volument da spediziun d'exemplars sa reducescha per 6,3 milliuns a total 133,3 milliuns exemplars.

Concentraziun da la pressa

Las raschuns principalas per la digren dals titel è tenor l'Uffizi federal per communicaziun

  • la concentraziun da las gasettas che continuescha
  • la digren dals abunnents
  • che las gasettas cumparian memia pauc savens
  • che gasettas stampadas vegnan stritgadas per ina versiun online

En tut paja la confederaziun mintg'onn 50 milliuns francs per la promoziun indirecta da la pressa. 30 milliuns en favur da gasettas localas e regiunalas, 20 milliuns per la pressa da commembers e fundaziun.

RR novitads 12:00

Artitgels legids il pli savens