In ferm franc e prognosas da creschientschas curregidas vers engiu: La Confederaziun cumbatta cun entradas che creschan be plaun e sto perquai franar sias expensas. Il parlament ha gia prendì mesiras da radund ina milliarda francs per distgargiar las finanzas durant il 2016.
Mintga champ federal sto gidar da spargnar
Tuttina restan deficits, ed uschia èsi necessari da spargnar vinavant, ha ditg il minister da finanzas Ueli Maurer a las medias. La regenza vul distgargiar il tegnairchasa federal cun il program da stabilisaziun 2017-2019. Annualmain muntass quai ina summa d’ulteriuras 800 milliuns fin ina milliarda francs. Cun totalmain 24 mesiras duain tuts champs da la Confederaziun contribuir lur part per distgargiar il tegnairchasa.
A partir dal 2018 smanatschan deficits structurals da fin 1,5 milliardas francs, communitgescha il Cussegl federal. Perquai vul el decider las emnas proximas anc ulteriuras mesiras da spargn. Uss va la fatschenta en il parlament.
RR novitads 15:00