Il fund davos da la fotografia mussa ina carta da la rait da viafier cun las pli impurtantas colliaziuns – ils cussegliers e las cusseglieras federalas èn localisads sin la foti tenor lur derivanza. Il Cussegl federal simbolic per la diversitad en il pajais, il Cussegl federal ch'unescha las fermezzas da la Svizra. Quai èn ils temas che la nova fotografia uffiziala vul simbolisar.
Exact sco ils commembers dal Cussegl federal, sa differenzieschan er Svizras e Svizzers tenor lur derivanza, lingua, cultura e mentalitad. E tuts ensemen essan nus la Svizra. Quella diversitad fa or la fermezza da noss pajais
Quest bain custaivel saja oz tant pli impurtant, la pandemia da corona mettia il mintgadi sin il chau e la pazienzia sin la prova. Ord quest motiv stoppian ins mussar tge ch'uneschia, betg quai che separeschia.
Publitgà anticipadamain
La fotografia uffiziala dal Cussegl federal vegn publitgada tradiziunalmain da Silvester a las 12:00. La Chanzlia federala ha quest onn dentant er laschà far in uschènumnà «making-off», pia in filmin co la foti è vegnida producida. Quel è dentant gia vegnì publitgà la bun'ura sin la plattafurma Youtube, uschia che la foti è era vegnida publitgada pli baud che planisà.
Fatg la fotografia ha il fotograf tessinais Stefano Spinelli.