La Svizra duai sa participar a Sky Shield, ina defensiun da l'aria communabla en l'Europa. Quai ha decis il Cussegl federal cun approvar la decleraziun d'entrada. Per la Svizra saja surtut impurtant da pudair coordinar meglier projects d'acquisiziun, la scolaziun sco era aspects logistics. La neutralitad da la Svizra vegnia fixada en ina decleraziun supplementara.
La stad passada aveva il Cussegl federal gia suttascrit ina decleraziun d'intenziun da sa participar a Sky Shield. Sco proxim pon s'exprimer differentas cumissiuns da las chombras federalas. Sch’els avessan resalvas, vegn il VBS a suttametter al Cussegl federal ina proposta davart l’ulteriur proceder. La PPS e la Pro Svizra avevan crititgà tar l’annunzia la stad 2023 il confess a Sky Shield.
Sky Shield è vegnì lantschà suenter attatga sin Ucraina
L'iniziativa da Sky Shield era vegnida lantschada l'avust 2022 da la Germania, in mez onn suenter l'attatga russa sin l'Ucraina. La finamira saja da stuppar rusnas en la defensiun d'Europa. Concret da coordinar meglier projects d’acquisiziun per la defensiun da l’aria e d’eventualmain era concentrar quels. Era duai dar cooperaziuns tar la scolaziun, tar il mantegniment e tar la logistica.
