Siglir tar il cuntegn

Svizra Cussegl federal vul alternativa al stop da medis

La revisiun na sajan nagina revoluziun, ma in’avischinaziun meglierada cun intgins elements novs. Quai ha communitgà il minister da sanadad Alain Berset il mardi suenter la sesida dal Cussegl federal a las medias.

Legende: Audio Saira: Cussegl federal propona alternativa tar stop da medis abspielen. Laufzeit 02:57 Minuten.
02:57 min, Actualitad dals 09.05.2018.

Memia blers medis spezials fan ir ad aut ils custs per la sanadad. Perquai vul il Cussegl federal limitar da nov l’admissiun per medis da l'exteriur. Ils chantuns duajan survegnir in instrument duraivel per evitar, ch’i dettia ina surcapacitad en il sectur da sanadad.

Chantuns duajan limitar tenor regiuns e secturs spezials

Concret vul quai dir, ch’ils chantun han en avegnir en maun sez da limitar cifras da medis tenor regiuns e secturs spezials. En pli vul il Cussegl federal vegnir pli sever tar las pretaisas a quellas e quels medis, che vulan avrir ina pratica, scriva el en ses messadi per mauns dal parlament.

Medis sin in pierten d'ospidal.
Legenda: Limitar l'access als medis – per far quai vul il Cussegl federal dar novs instruments als chantuns (maletg simbolic). Keystone

Examens per medis da l'exteriur

Ultra da quai prevesa il Cussegl federal examens per medis da l'exteriur - per ch'els enconuschian il sistem da sanadad en Svizra - e sch'i veglian far giu quint cun las cassas da malsauns.

Gia oz vegn regulà, quants medis u medias che dastgan pratitgar – cun il uschenumnà «stop da medis». Quest reglament intermediar va dentant a fin l’onn proxim. Perquai vul Alain Berset stgaffir uss in reglament duraivel che vegn in funcziun enfin il fanadur 2019.

RR novitads 15:00