Siglir tar il cuntegn

Svizra Cussegl federal vul dapli dunnas en posiziuns da cader

Il Cussegl federal ha deliberà la mesemna ses messadi davart la revisiun dal dretg dad aczias. En quel duai tranter auter vegnir fixà differents puncts pertutgant «dunnas en posiziuns da cader».

Chalzers da dus persunas, in um ed ina dunna.
Legenda: Il Cussegl federal vul dapli dunnas en posiziuns da cader. Keystone

En ses messadi ha il Cussegl federal deliberà tranter auter, ch'almain 30% dals posts en cussegls d'administraziun da firmas quotadas a la bursa duajan vegnir occupads da dunnas. En sia direcziun duajan questas firmas avair almain 20% dunnas. Il Cussegl federal na discurra dentant betg da «quotas» mabain da «valur directivas». Sancziuns n'èn betg previsas – quel che na sa tegnia però betg vid questa regla, stoppia argumentar quai. Questa mesira duai intensivar las stentas da l'economia da promover dunnas en posiziuns da cader.

Il Cussegl federal vul che quai vegnia fixà en il nov dretg dad aczias, entras il qual ch'i vegn er realisà «l'iniziativa da raffaders».

Regular pajaments da cader

Il Cussegl federal proceda cunter auts boni en fatschentas liadas a la Confederaziun. Perquai duajan il cumpart da pajaments variabels e las prestaziuns supplementaras dal cader vegnir limitads. Ils pajaments duajan mintgamai vegnir fixads ordavant durant las radunanzas generalas. Igl è previs, che las fatschentas pertutgadas midan lur statuts l'onn 2018.

Il schef da la RUAG Urs Breitmeier.
Legenda: Il schef da la RUAG Urs Breitmeier, che ha survegnì l'onn passà auts boni. Keystone

Discussiuns pervia da pajaments da cader

Il svilup dals pajaments da cader en fatschentas liadas a la Confederaziun han avert discussiuns en la populaziun – il davos cura ch'ils pajaments variabels e boni dal schef da la RUAG Urs Breitmeier eran l'onn passà pli autas ch'il pajament fixà.

RR novitads 15:00