Il president da la Confederaziun, Johann Schneider-Ammann ha declerà a las medias a Berna che las universitads hajan gia augmentà lur capacitads per la medischina umana. I dovria dentant anc dapli stentas per cuntanscher la finamira da 1'300 plazzas ad onn. Il mument na scoleschian las universitads betg avunda medis per tgirar la populaziun. Radund in terz dals medis en Svizra vegnan actualmain da l'exteriur.
Dublegià il dumber da spezialists
Ina bilantscha positiva ha Schneider-Amman pudì trair dal plan da master ch'il Cussegl federal ha lantschà avant passa tschintg onns ensemen cun ils chantuns e las organisaziuns da las professiuns da tgira. Cumpareglià cun avant diesch onns è il dumber da spezialistas e spezialists da la sanadad diplomads sa dublegiads. Da 1500 sin 3700. Quai na bastia dentant anc betg per cuvrir la dumonda indigena. Tenor il Cusseglier federal Johann Schneider-Ammann dovri perquai stentas supplementaras da tut ils involvids.