Pertge ina clausula da ventil, che scumonda a burgais da l’UE da lavurar en Svizra, violescha la cunvegna da la libra circulaziun cun l’Uniun europeica. En il cas extrem smanatscha vegnissan il contracts bilaterals cun l’UE sistids.
PPS smanatscha cun in’iniziativa
La partida populara svizra smanatscha cun in'iniziativa per desdir la cunvegna da la libra circulaziun da persunas sch'il Cussegl federal ed il parlament impedeschan da realisar la veglia dal pievel per limitar l'immigraziun. Quai scriva la PPS en sia posiziun vers la proposta dal Cussegl federal da vulair realisar l'iniziativa d'immigraziun da massa cun ina clausula da ventil. I manchian cleras ideas co l'immigraziun possia vegnir sminuida marcantamain cun questa clausula, scriva la PPS.
La Partida socialdemocratica renviescha ina clausula da protecziun unilaterala per realisar l’iniziativa d’immigraziun da massa. Cun ina tala clausula vegnissan tut las relaziuns bilateralas cun l’UE e la bainstanza da la Svizra messa en dumonda, scriva la PS. L’immigraziun possia sulet vegnir reglada cun refurmas politicas en Svizra, argumentescha la PS.
Critica da Travail.Suisse
La Federaziun da tetg dals lavurers Travail.Suisse crititgescha la decisiun dal Cussegl federal. Il problem vegnia sulet spustads, ed er las mesiras per la protecziun da las pajas e las relaziuns da lavur na bastan betg, scriva Travail.Suisse.
Sustegn da PLD e PCD
Sulet las partidas PLD e PCD sustegnan il cussegl federal e vesan la clausula sco la suletta opziun u sco via pratitgabla.
RR novitads 14.00/17:00