L'onn passà èn radund 3'000 persunas vegnidas tractadas cun products da cannabis. Savens èn quai persunas pli veglias u persunas che pateschan da malsognas nuncurablas sco sclerosa multipla u cancer en il stadi final. Cannabis po qua mitigiar las dolurs.
Per mintga tractament dovri dentant ina lubientscha excepziunala. Quai vul il Cussegl federal uss midar ed ha incumbensà il departament federal da l'intern da preschentar enfin en in onn ina revisiun da la lescha correspundenta.
Ultra da quai vul el crear in artitgel spezial per emprovas da pilot cun cannabis. Quel na midia nagut vi dal scumond da consumar cannabis, pussibiliteschia dentant d'examinar a moda scientifica novas vias en la prevenziun ed en il cumbat da la criminalitad e duai esser limità sin 10 onns.
RR novitads 17:00