Sch'ina fatschenta sa chasa en ina regiun economicamain debla sa ella quintar cun levgiaments da taglia. Quai tant dal chantun sco era da la Confederaziun. Il Cussegl federal vul ussa dentant definir ina limita maximala per tals sustegns. Oz ha el perquai dà en consultaziun ina revisiun totala da l'ordinaziun correspundenta.
Limita per levgiaments
La finamira saja da crear e mantegnair plazzas. Element central da la revisiun saja perquai d'introducir ina limita per levgiaments da taglia enstagl da la procentuala che vala oz. Il sboz dal Cussegl federal fixescha plinavant la basa per dapli transparenza. En l'avegnir duain uschia vegnir publitgads annualmain ils nums da las firmas ed ils levgiaments da taglia.
Tge regiuns pon insumma profitar
Da discurrer dat dentant betg exnum quella limita, mabain il fatg che la Confederaziun vul il medem mument era definir da nov tge regiuns che pon insumma profitar da tals levgiaments.