Il Cussegl federal na vul nagin congedi da paternitad da quatter emnas. Ils custs – tenor quints da l'administraziun radund 420 milliuns francs l'onn – sajan in memia grond frain per l'economia, argumentescha il Cussegl federal. El vul metter la paisa sin il schlargiament da la tgira d'uffants cumplementara a la famiglia. Cun quai saja gidà als geniturs betg be gist suenter la naschientscha da l'uffant mabain durant la vegliadetgna prescolara ed era durant il temp da scola.
Betg vesì ils segns dal temp
Ils iniziants manegian ch'il Cussegl federal na vesia betg ils segns dal temp. Els èn persvas che la populaziun vul in tal congedi da paternitad. Era la PCD deplorescha la decisiun ell'avess almain spetgà ina cuntraproposta dal Cussegl federal. Ils iniziants èn persvadids ch'il pievel fiss da lur vart.
La PS è trumpada
La Partida socialdemocratica ha entant inculpà la regenza dad avair nagina curascha. L'argument dals daners na giaja betg si damai ch'il Cussegl federal haja anc en la medema sesida decidì da metter a disposiziun ina milliada francs per duas emnas gieus olimpics.
RR novitads 16:00