La Svizra vul sustegnair la reconstrucziun da l'Ucraina, per ils proxims 12 onns cun 5 milliardas francs. Quai saja in signal ferm per la solidaritad cun las persunas pertutgadas da la guerra en l'Ucraina, ha communitgà il Cussegl federal.
Ultra da quai possian ins promover la stabilitad sin il continent europeic ed era reducir il moviment da migraziun. En in emprim pass vul il Cussegl federal dumandar enfin il 2028, 1,5 milliardas francs or da la collavuraziun internaziunala. Per il temp a partir dal 2029 duain lura vegnir examinadas «ulteriuras vias da finanziaziun» sur la collavuraziun internaziunala per finanziar las 3,5 milliardas francs.
Fin uss ha la Svizra pajà radund 3 milliardas francs
La Confederaziun sa participescha gia dapi l'entschatta da la guerra a projects per l'Ucraina. Per exempel sustegn la Svizra projects da reconstruir infrastructura civila sco energia, vias u sanadad. Per quest intent ha la Confederaziun impundì dapi l’entschatta da la guerra var 3 milliardas francs. Circa 425 milliuns francs da quels èn derivads dal preventiv da la collavuraziun internaziunala. Ultra da quai ha il Secretariat da stadi per la migraziun (SEM) impundì circa 2,5 milliardas francs per prender si persunas cun status da protecziun S.
