La Svizra duai vinavant sa participar finanzialmain vi da la protecziun dals cunfins da Schengen. Sco emprim cussegl ha la Chombra gronda approvà la fatschenta correspundenta. I va per ina contribuziun da radund 300 milliuns francs durant ils proxims set onns. Il nov fond remplazza in vegl che la Svizra paja gia en dapi il 2018 e ch'è scadì il 2020.
Cun quels daners duai vegnir sustegnì ils stadis da Schengen ch'han in lung cunfin dal pajais u da la mar. La Svizra survegna dal fond 50 milliuns francs per mesiras naziunalas. La finamira dal fond saja dad augmentar la segirezza en Svizra ed impedir migraziun irregulara.
Il Cussegl naziunal ha decidì cun 105 cunter 65 vuschs e 21 abstenziuns. Cunzunt ina part da la PPS ha tegnì encunter perquai che la protecziun dals cunfins da Schengen na funcziunia betg e la cumpart che la Svizra paja saja surproporziunalmain gronda. Ils Verds han per gronda part betg dà lur vusch. Els fan quitads pervi dals dretgs umans.
Sco proxim va la fatschenta uss en il Cussegl dals chantuns.
