Il Cussegl naziunal è bain da l'avis che l'infrastructura d’informatica da l'administraziun federala duai vegnir protegida meglier d'attatgas.
La gronda part da las partidas burgaisas n'è dentant betg cuntenta cun la lescha davart la segirtad da las infurmaziuns ch'il Cussegl federal ha preschentà ed ha decidì da gnanc entrar en debatta. Cun 117 cunter 68 vuschs ha il cussegl naziunal ditg na a la lescha.
Custs memia auts – memia blers artitgels
L'argument principal dals adversaris èn ils custs. I na saja betg cler quant che la strategia da segirtad vegnia a custar. Tut tenor nivel da segirtad saja da quintar cun custs da 5 fin 80 milliuns francs. Quei saja memia nunprecis. Ultra da quai cuntegnia la lescha da quai da 90 artitgels – memia blers. I dovria ina lescha pli effizienta.
Parmelin ha cumbattì cun vehemenza
Cumbattì cun vehemenza per standards minimals da segirtad tar ils computers ed ils chanals da communicaziun da la Confederaziun ha il Cusseglier federal Guy Parmelin. Adumbatten ha el declerà che la lescha saja da grond'impurtanza per la segirtad naziunala. Sustegn ha el survegnì da la sanestra che ha bain concedì che la lescha saja cumplexa, ma che las attatgas ch'i ha dà ils davos onns sin la Confederaziun mussian cleramain il basegn d'agir.
La fatschenta turna anc ina giada en il Cussegl dals chantuns.
RR novitads 12:00