Oz sa radunan las deputadas ed ils deputads dal Cussegl naziunal a Berna. Durant trais dis discutescha e decida la chombra gronda tranter auter davart la lescha federala da chatscha e davart las segiradas.
Dapli dretgs per las segiradas ni per ils clients?
La lescha federala davart ils contracts da segiradas ha gia chaschunà avant la debatta per lingias grassas. La proposta ch'il Cussegl federal ha preschentà cuntegn intgins artitgels ch'èn cleramain en favur da las segiradas. Per exempel duain las segiradas pudair midar las cundiziuns da la segirada senza dumandar il client sch'el è d'accord cun quella midada.
Pia era sch'in client ha pajà durant onns per sia segirada supplementara, per exempel per ch'el vegni operads en quai ospital ch'el vul, sa la segirada simplamain decider che quai na vala betg pli. Bain ston ellas infurmar il client da la midada ed el ha lura era la pussaivladad da visar il contract. Tar ina segirada supplementara cunter malsognas na gida quai dentant betg la massa. E per clients gia pli vegls èsi per strusch pli pussaivel da chattar in'autra cassa da malsauns che porscha in tal contract.
Curt ditg vai per la dumonda: Duain las segiradas stuair sa tegnair vid il contract ni pon ellas simplamain midar las cundiziuns a disfavur dal client.
Ella cumissiun era quella decisiun a favur da las segiradas crudada fitg stretg, mo cun la vusch da tagl dal president. Ella debatta ella chombra gronda èsi perquai da spetgar in dir cumbat.
Damain protecziun per il luf
In cumbat vegni era a dar tar la lescha federala da chatscha. Era quella duai vegnir midada ed era qua datti dispita pervia da tscherts artitgels. In dals protagonists principals è puspè ina giada il luf. Ad el duai ir vid il pail.
Il Cussegl federal propona da schluccar la protecziun dal luf uschia ch'ins po era sajettar el senza ch'i ha dà gronds donns. Avant quatter onns ha il parlament approvà ina moziun dal Cusseglier dals chantuns cristiandemocrat, Stefan Engler, che pretenda gist quai. Ultra da quai vul ina maioritad da la cumissiun renunziar sin la pretensiun ch'ins stoppia prender mesiras per proteger muntaneras dal luf avant ch'ins dastga sajettar lez.
Per ina ferma minoritad da la cumissiun van quellas prescripziuns bler memia lunsch ed i vegn gia smanatschà cun il referendum cunter la revisiun da la lescha da chatscha. Sco gia tar la lescha davart ils contracts da las segiradas vegni era tar quella fatschenta a dar ina debatta pulit animada.
RR actualitad 08:15