Siglir tar il cuntegn

Header

video
Segund di da la debatta davart abitaziuns secundaras
Or da Actualitad dals 04.03.2015.
laschar ir. Durada: 1 minuta 21 Secundas.
cuntegn

Svizra Cussegl naziunal di gea a lescha d’abitaziuns secundaras

Il Cussegl naziunal ha approvà la lescha da las abitaziuns secundaras cun 143 cunter 6 vuschs e cun 47 abstenziuns.

Betg dà giu la vusch han ina maioritad dals Verds, da la PCD e da la PBD. La cumissiun aveva proponì da declerar la lescha sco urgenta per ch'ella po ir en vigur suenter avair deliberar ella. Quai ha la chombra gronda dentant refusà, cun quai ch'i vegnia renunzià dal referendum. Uschia pudess il Cussegl federal realisar la lescha suenter las consultaziuns parlamentaras.

Probabel datti retard

Ussa va la fatschenta enavos en il Cussegl dals chantuns. Probabel datti dentant retard. Pervi da las bleras differenzas n'èsi betg cler sch'il Cussegl dals chantuns po tractar la fatschenta anc durant questa sessiun, uschia ha ditg la Cussegliera federala Doris Leuthard.

video
Reacziuns ord l'Engiadina davart la lescha d'abitaziuns secundaras
Or da Actualitad dals 04.03.2015.
laschar ir. Durada: 2 minutas 36 Secundas.

50% è meglier che 0% abitaziuns secundaras

En sasez na pudess ins pli far or da hotels abitaziuns secundaras. Quai dapi l’iniziativa d’abitaziuns secundaras. Ussa fa il parlament dentond in cumpromiss. Hotels che èn pli vegls sco 25 onns, duai ins pudair far or da la mesadad dal hotel abitaziuns secundaras. Andreas Züllig, president da Hotteleriesuisse, è cuntent ch’igl dat in cumpromiss, dentant na porta quel pauc. Sch’in hotel na è betg rentabel, lura na è el probablamain era betg rentabel en furma pli pitschna. Funcziunar po quell’idea mo, sch’ins savess far or da la segunda mitad butias u abitaziuns primaras. Sche quai è pussibel, na è dentant tenor Andreas Züllig betg anc clar. Hotteleriesuisse spera, che il parlament decida la fin finala, che hotels pon midar 100% en abitaziuns secundaras.

Sperar sin il Cussegl dals chantuns

Betg cuntent cun il cumpromiss ch’il Cussegl naziunal ha acceptà cun la midada dal sboz da lescha da las abitaziuns secundaras, è la societad grischuna dals impressaris da construcziun. Tenor ses manader da fatschenta, Andreas Felix, sa pegiurescha uschia la situaziun mo anc pli fitg per la branscha da construcziun en il Grischun. Els prefereschian il sboz da lescha ch'il Cussegl dals chantuns haja decidì l'emprima giada. Ussa spera Andreas Felix ch'il Cussegl dals chantuns vegnia anc ad adattar il sboz da lescha a favur dals chantuns muntagnards ed a favur da la branscha da construcziun.

Bleras dumondas anc avertas

Las midadas decididas cun il cumpromiss, laschian en pli era anc bleras dumondas avertas. Sper quella per exempel co in hotel che na renda betg, duess render sch'el po transfurmar la mesadad da ses bajetg en segundas abitaziuns, dettia quai era dumondas avertas en connex cun las restricziuns tar la midada da chasas veglias en abitaziuns secundaras. Tenor cumpromiss dastgian numnadamain mo pli bajetgs vegnir midads en abitaziuns secundaras, sch'els sajan protegids ni pregnants per il maletg dal vitg. “Tge che succeda cun tschels bajetgs, n’è uschia betg cler”, di Andreas Felix.

Main giasts, main persunal

Il ferm franc svizzer fa difficultads als turissem indigen. Pel mument na badi ans anc betg uschè ferm al ferm franc. Dentant è quai pervi da la bun’aura en ils mais schaner e favrer. Sche vegn dentond la situaziun, che main giast vegnan, lura vegn ins a stuair impiegar a main collavuraturs per la stagiun da stad. Tenor il president da Hoteleriesuisse, Andreas Züllig, la pli effectiva varianta per spargnar en custs. Tar main giasts na dovri ans era betg uschia bler persunal. Tar marschas na sia igl betg pli pussibel da spargnar. Quai ans haja gia fatg en ils ultims onns. Era la paja dal directur na sia da congualar cun quella da l’industria da chemia u tar bancas. Las pajas da hoteliers sia sa gia magari bassa.

Artitgels legids il pli savens