Siglir tar il cuntegn

Header

video
Cussegl naziunal: Resultats da votaziuns uss er per rumantsch
Or da Telesguard dals 11.09.2018.
laschar ir. Durada: 3 minutas 16 Secundas.
cuntegn

Svizra Cussegl naziunal di Gea u Na

Ils resultats da las votaziuns en la Chombra gronda vegnan da nov era mussads per rumantsch.

Dà l'impuls per la midada ha Anton Derungs, l’anteriur mistral da la Val Lumnezia. Quai haja gia daditg disturbà el ch’ils resultats da las votaziuns en il Parlament federal vegnivan adina mussads cun texts tudestgs, franzos e talians. Il rumantsch mancavia però adina. A chaschun dad in inscunter cun il cusseglier naziunal Martin Candinas (PCD) haja el fatg attent lez sin quai fatg. Il rumantsch saja era in linguatg naziunal e tutgia perquai era sin ils moniturs dal parlament.

audio
Bunura: Cussegl naziunal: Tavla da resultats er per rumantsch
ord Actualitad dals 11.09.2018.
laschar ir. Durada: 3 minutas 6 Secundas.

Candinas ha sinaquai dumandà ils Servetschs dal parlament sch'i na saja betg pussaivel d’agiuntar il rumantsch. Quai, sco i para, gist il dretg mument. Tenor Mark Stucki dals Servetschs dal parlament hajan els gì planisà da remplazzar questa stad tut ils moniturs e la tecnica correspundenta. Uschia saja stà pussaivel da era gist integrar il rumantsch. Tut quai senza investiziuns supplementaras.

A chaschun da la premiera dal sistem nov ha Anton Derungs fatg visita en Chasa federala. Davent da la tribuna sur la sala dal Cussegl naziunal ha el ensemen cun ses frar e ses quinà pudì observar l’emprima votaziun cun il sistem nov en quatter linguatgs. El saja cuntent che quai haja funcziunà e ch’il Parlament federal haja pudì ademplir ses giavisch. Ed in zic losch ch’igl è gartegià è el era.

RR actualitad 07:00

Artitgels legids il pli savens